ليه كل حاجه بقت عندنا عادى
تيجى تقول لواحد انت بتكلم البنت دى بصفتك ايه يقولى عادى يعنى
تقول لوالدة واحده بنتك طول النهار بتكلم ولد معين تقول عادى ما هما مسيرهم يجوزوا
تشوف واحد وتساله انت هدفك ايه فى الحياة يقولك عادى يعنى مفيش
تسأل واحد تقوله انت بتعمل ايه لبلدك يقولك عادى يعنى زى اى حد
هل احنا كشعب وصل بينا التخلف اننا بقينا مش عارفين اى حاجه فى حياتنا
ضاعت كل مبادئنا واخلاقيتنا واهدافنا وكل حاجه
تشوف حاجات غريبة جدا بتحصل قدامك وتسأل ازاى ده يحصل يقولولك عادى
تشوف واحد بيدى رشوة لموظف عشان يخلصله شغله ويقولك عادى هو ده الطبيعى
هل احنا وصلنا للدرجة دى اننا خلاص استسلمنا للفساد فى كل حاجه حكومة وشعب واخلاق
وبقى الفساد والإنحلال الأخلاقى ده هو العادى بتاعنا
تشوف واحد ليل نهار على المواقع الإباحية وتسأله ليه كده يقولك عادى ما هى كل الشباب بتتفرج
انا بجد بضايق جدا من الكلمة دى
حاجات كتيير اوى بتحصل غلط قدامنا
الفرق بقى من خمس سنين والوقتى ايه
ان زمان كان الناس بتعمل الغلط وهيا عارفه انها غلطانه فهيجى عليها يوم وترجع
لكن الوقتى الناس بتعمل الغلط وببجاحه فظيعه جدا ويقولك عادى
بجد ربنا يثبتنا على ديننا ودعوتنا ومبادئنا
لأن احنا بقينا فى عالم الحلال اختلط بالحرام بطريقة صعبه جدا
ربنا يحفظنا
